കീറ്റോ ഡയറ്റിൽ അനുവദനീയമായ / അല്ലാത്ത ഭക്ഷണപദാർത്ഥങ്ങൾ.

അന്നജങ്ങൾ പരമാവധി ഒഴിവാക്കുക, ശുദ്ധമായ , പ്രകൃതി ദത്തമായ കൊഴുപ്പുകൾ വർധിപ്പിക്കുക , മിതമായ അളവിൽ മാംസ്യം കഴിക്കുക എന്നതാണ് കീറ്റോ ഡയറ്റിന്റെ അടിസ്ഥാന നിയമം. അതിലൊതുങ്ങിയിട്ടുള്ള നമുക്ക് ഇഷ്ടപ്പെട്ട എല്ലാ ഭക്ഷണവും ഇഷ്ടപ്പെട്ട രീതിയിൽ ആവശ്യമുണ്ടെങ്കിൽ വിശപ്പടങ്ങുവോളം കഴിക്കാം. പച്ചക്കറികളും അണ്ടിവർഗങ്ങളും കഴിക്കാം.

ഫാമിൽ വളർത്തുന്ന ബ്രോയ്‌ലർ കോഴിയല്ലാത്ത ഏതു മാംസവും കഴിക്കാം.  കൊഴുപ്പു കൂടിയ ഭാഗങ്ങൾ കൂടുതൽ കഴിക്കുക. ആന്തരികാവയവങ്ങളായ തലച്ചോറ്, കരൾ, കിഡ്‌നി, ഹൃദയം, കുടൽ, ശ്വാസകോശം എന്നിവ കൂടുതൽ നല്ലതാണ് .

പോത്ത്, കാള , ആട്, ഒട്ടകം, നാടൻ കോഴി, താറാവ്, മുയൽ, കാട, കാട്ടുമൃഗങ്ങൾ തുടങ്ങി എല്ലാ പക്ഷി മൃഗാദികളെയും ഭക്ഷിക്കാം. വെളിച്ചെണ്ണയോ ബട്ടറോ ഉപയോഗിച്ച് പാകം ചെയ്തു ഭക്ഷിക്കാം. ഗ്രിൽ ചെയ്തും കഴിക്കാം. ഒലിവോയിൽ ചേർത്ത് കഴിക്കാം.

എല്ലാവിധ മത്സ്യങ്ങളും മുട്ടകളും കഴിക്കാം.

ബട്ടർ, വിവിധതരം ചീസുകൾ, ക്രീം തുടങ്ങിയ പാലുൽപ്പന്നങ്ങളും കൊഴുപ്പു കളയാത്ത പാൽ, തൈര്, മോര് എന്നിവയും കഴിക്കാം. പാൽ കൂടുതൽ കഴിക്കുന്നത് നല്ലതല്ല. അതിൽ ലാക്ടോസ് എന്ന അന്നജം ഉണ്ട്. ബട്ടർ ഈ ഡയറ്റിലെ  ഒരു പ്രധാന ഭക്ഷണമാണ്.

അണ്ടിവർഗങ്ങൾ എല്ലാം നല്ലതാണ് . ബദാം, walnut, pecan, macadamia, ബ്രസീൽ നട്ട്, hazel nut ഇവ വളരെ നല്ലതാണു. കശുവണ്ടി, പിസ്ത എന്നിവ കുറച്ചു കഴിക്കാം.

പച്ചക്കറികളിൽ പയറുവർഗങ്ങൾ, കടല വർഗങ്ങൾ, കിഴങ്ങു വർഗങ്ങൾ എന്നിവ ഒഴിച്ച് ബാക്കിയെല്ലാം കഴിക്കാം.

കാബേജ്, കോളിഫ്ലവർ, ബ്രോക്കോളി, സുക്കിനി, ബ്രസ്സൽ സ് പ്രൗ ട് സ്, കക്കരി, തക്കാളി, വഴുതന, വെണ്ട , കാപ്സികം, കുമ്പളം, ചെരങ്ങ തുടങ്ങി എല്ലാ പച്ചക്കറികളും കഴിക്കാം.

ലെറ്റൂസ്, കെയിൽ, പാലക്, ചീര, മുരിങ്ങ തുടങ്ങി എല്ലാ ഇലക്കറികളും കഴിക്കാം.

ഒഴിവാക്കേണ്ടവ ഇവയാണ്

എല്ലാവിധ ധാന്യങ്ങളും  – അരി, ഗോതമ്പ്, ചോളം, റാഗി, ബാർലി, ഓട്സ്  തുടങ്ങിയവയും അവ ഉപയോഗിച്ചുണ്ടാക്കുന്ന എല്ലാ ഭക്ഷണങ്ങളും. ചോറ്, ചപ്പാത്തി, ബ്രഡ് , പത്തിരി, പുട്ട് , അപ്പം, ദോശ, ഇഡ്ഡലി, ബേക്കറി, പുഡ്ഡിംഗ്, പായസം തുടങ്ങിയവ.

കിഴങ്ങു വർഗങ്ങൾ – കപ്പ, മധുരക്കിഴങ്ങ്, ഉരുളകിഴങ്ങ്, ബീറ്റ്റൂട്ട് തുടങ്ങിയവ.

മധുരമുള്ള എല്ലാ പഴങ്ങളും – അവ പഴുക്കാത്ത അവസ്ഥയിലും കഴിക്കാൻ പാടില്ല. പഴങ്ങളിൽ ബട്ടർ , ബെറിസ് ഇവ മാത്രമേ അനുവദനീയമുള്ളൂ.

വെളിച്ചെണ്ണ, ഒലിവു ഓയിൽ  എന്നിവയല്ലാത്ത എല്ലാ സസ്യ എണ്ണകളും ഒഴിവാക്കണം.

ഡാൽഡ, മാർഗറിൻ തുടങ്ങിയ എല്ലാ കൃത്രിമക്കൊഴുപ്പുകളും ട്രാൻസ് ഫാറ്റും പൂർണമായി ഒഴിവാക്കണം.

                                                    കഴിക്കാൻ പാടില്ലാത്തവ

യൂറിക് ആസിഡ്, ക്രിയാറ്റിൻ എന്നിവ രക്തത്തിൽ കൂടുതൽ ഉള്ളവർ മാംസ്യം (Protein) പരമാവധി കുറക്കുക. മാംസം കുറച്ചു, മൽസ്യം, മുട്ട അല്പമൊക്കെ കഴിക്കാം. അത്തരക്കാർ ബട്ടർ, ചീസ്, ഒലിവു ഓയിൽ എന്നിവ ഭക്ഷണത്തിൽ കൂടുതൽ ഉൾപെടുത്തുക. യൂറിക് ആസിഡ്, ക്രിയാറ്റിൻ ഇവ സാധാരണ നിലയിലായാൽ പിന്നെ സാധാരണ LCHF ഡയറ്റ് തന്നെ തുടരാം.

കാൻസർ ഉള്ളവർ ഡയറ്റ് ചെയ്യുമ്പോൾ അന്നജം പൂർണമായി ഉപേക്ഷിക്കണം. പച്ചക്കറികൾ കഴിക്കാം. അവരും മാംസ്യം പരമാവധി ഒഴിവാക്കണം. കാൻസർ രോഗികൾ രണ്ടു മാസം കൂടുമ്പോൾ, ഒരാഴ്ച നീണ്ടു നിൽക്കുന്ന ഉപവാസം (water fasting) എടുക്കുന്നത് Autophagy വേഗത കൂട്ടാൻ ഉപകരിക്കും. അതിലൂടെ അർബുദ കോശങ്ങൾ പെട്ടെന്നു നശിച്ചു പോകും.

ആസ്തമ രോഗികൾ LCHF ന്റെ കൂടെ വർഷത്തിൽ ഒരിക്കൽ ഒരാഴ്ച നീണ്ട water fasting എടുക്കുന്നത് വളരെ നല്ലതാണ്.

ഒരു ദിവസത്തെ ഭക്ഷണരീതി- മാതൃക 

പ്രാതൽ :

25 ഗ്രാം ഉപ്പില്ലാത്ത ബട്ടർ നന്നായി യോജിപ്പിച്ചെടുത്ത കട്ടൻ കാപ്പി.  അല്പം നട്ട് സ് കൂടെ കഴിക്കാം. ആദ്യദിവസങ്ങളിൽ വിശപ്പടങ്ങിയില്ല എന്ന് തോന്നിയാൽ രണ്ടോ മൂന്നോ മുട്ട പൊരിച്ചോ പുഴുങ്ങിയോ കഴിക്കാം. ധാരാളം വെള്ളമോ  മധുരമില്ലാത്ത ചായയോ കാപ്പിയോ ഇടയ്ക്കു കുടിക്കാം.

ഉച്ചഭക്ഷണം :

ഇറച്ചി, മീൻ, മുട്ട ഇവ പൊരിച്ചോ കറിവെച്ചോ കഴിക്കാം. കൂടെ സാലഡ്, പൊരിച്ച പച്ചക്കറികൾ ഇവയും കഴിക്കാം.

വൈകുന്നേരം:

കട്ടൻ ചായ, കാപ്പി മധുരമില്ലാതെ . കൂടെ നട്ട് സ് .

രാത്രി :

ഉച്ചയിലെ പോലെ . മാറ്റങ്ങൾ വരുത്താം .

ആദ്യം പറഞ്ഞ അതിരുകൾക്കുള്ളിൽ നിന്ന് കൊണ്ട് വേണ്ട മാറ്റങ്ങൾ വരുത്താം. മടുപ്പൊഴിവാക്കാൻ ധാരാളം  keto പാചകവിധികൾ ഇൻറർനെറ്റിൽ ലഭ്യമാണ്.

സംക്ഷിപ്തം

കീറ്റോ ഡയറ്റിന്റെ സിദ്ധാന്തമനുസരിച്ചു ഭക്ഷണ പദാർത്ഥങ്ങളെ നാലായി തരം തിരിക്കാം.

1.കഴിക്കേണ്ടത്
2.കഴിക്കാവുന്നത്
3.കുറക്കേണ്ടത്
4.ഒഴിവാക്കേണ്ടത്.

1- കഴിക്കേണ്ടത്
ബട്ടർ, വെളിച്ചെണ്ണ, ഒലിവ് ഓയിൽ, നെയ്യ്, ചീസ്, പനീർ, അണ്ടി വർഗ്ഗങ്ങൾ, പച്ചക്കറികൾ, ഇലക്കറികൾ, മഷ്‌റൂം, അവക്കാഡോ, കോഫീ, ചായ.

2- കഴിക്കാവുന്നത്
ബീഫ്, മട്ടൺ, നാടൻ കോഴി തുടങ്ങിയവയുടെ മാംസം, മത്സ്യം, മുട്ട, ബെറീസ്, ഗ്രെപ്പ് ഫ്രൂട്ട്, ആപ്പിൾ സിഡാർ വിനാഗിരി (ആപ്പിൾ സുർക്ക).

3- കുറക്കേണ്ടത്
(വല്ലപ്പോഴും ചെറിയ അളവിൽ കഴിക്കാമെന്നു മാത്രം) പാൽ, മധുരം കുറഞ്ഞ പഴങ്ങൾ (ഓറഞ്ച്, കിവി, പീച്ചസ്, ആപ്രിക്കോട്ട് തുടങ്ങിയവ). ബ്രോയിലർ ചിക്കെൻ, ഡാർക്ക് ചോക്കലേറ്റ്, പയർ, കടല വർഗ്ഗങ്ങൾ, കാരറ്റ്.

4- ഒഴിവാക്കേണ്ടത്
ധാന്യങ്ങൾ, കിഴങ്ങു വർഗ്ഗങ്ങൾ, പഞ്ചസാര, ബേക്കറി പലഹാരങ്ങൾ, പ്രോസെസ്ഡ് ഭക്ഷണ പദാർത്ഥങ്ങൾ, നല്ല മധുരമുള്ള പഴങ്ങൾ (വാഴപ്പഴം, മാങ്ങാ, കൈതച്ചക്ക, ചക്ക, തുടങ്ങിയവ), ട്രാൻസ് ഫാറ്റ്.

ഇത് വളരെ പ്രാഥമികമായ കാര്യങ്ങളാണ്. ഇത് വായിക്കുമ്പോൾ നിങ്ങൾക്ക് ഒരു ഏകദേശ ധാരണ മനസ്സിൽ വന്നിട്ടുണ്ടാകും. അതിന്റെ അടിസ്ഥാനത്തിൽ മറ്റു വസ്തുക്കൾ കഴിക്കാമോ ഇല്ലയോ എന്ന് നിങ്ങളുടെ സാമാന്യ ബോധത്തിന്റെ അടിസ്ഥാനത്തിൽ തീരുമാനിക്കുക. സംശയമുള്ള വസ്തുക്കളുടെ glycaemic load ഗൂഗിൾ ഉപയോഗിച്ചു കണ്ടു പിടിക്കുക. 100 ഗ്രാമിൽ 10 ഗ്രാമിൽ കൂടുതൽ കാർബ്‌ ഉള്ളവ ഒഴിവാക്കുക.